पुणे : महाराष्ट्र कॉस्मॉपॉलिटन एज्युकेशन (एमसीई) सोसायटीतर्फे डॉ. बाबासाहेब आंबेडकर जयंतीनिमित्त १४ एप्रिल २०१९ रोजी सकाळी ८.३० वाजता अभिवादन मिरवणुकीचे काढण्यात आली. या मिरवणुकीत १० हजार सर्वधर्मीय विद्यार्थी सहभागी झाले होते.
मिरवणुकीचे उद्घाटन ‘एमसीई’ सोसायटीचे अध्यक्ष डॉ. पी. ए. इनामदार यांच्या हस्ते करण्यात आले. संस्थेचे सचिव लतिफ मगदूम यांनी मिरवणुकीचे नेतृत्व केले. मिरवणुकीचे हे १५ वे वर्ष होते. या मिरवणुकीत संस्थेच्या ३० आस्थापनांतील १० हजार अल्पसंख्याक, सर्वधर्मीय विद्यार्थी, प्राचार्य, प्राध्यापक, शिक्षकेतर कर्मचारी सहभागी झाले. दरबार ब्रास बॅंडची दोन पथके, ढोल-ताशांचा मिरवणुकीत समावेश होता. राखीव जागांच्या संदर्भात महात्मा गांधी-डॉ आंबेडकर यांच्यातील ‘पुणे करार’ हा जिवंत देखावा या मिरवणुकीचे आकर्षण ठरला.
आझम कॅम्पस येथून मिरवणुकीस प्रारंभ होऊन पुना कॉलेज, गोल्डन ज्युबिली, जुना मोटार स्टँड, पद्मजी पोलीस चौकी, भारत सिनेमा, ए. डी. कॅम्प चौक, मॉडर्न बेकरी चौक, संत नरपतगिरी चौक, वीज वितरण कार्यालय, जिल्हा परिषदमार्गे जिल्हाधिकारी कार्यालय परिसरातील डॉ. आंबेडकर पुतळ्याला पुष्पहार अर्पण करून मिरवणुकीची सांगता झाली.
अवामी महाज या सामाजिक संघटनेतर्फे मिरवणुकीच्या मार्गावर मोफत पाणपोई आणि सरबत वाटप केंद्राची व्यवस्था केली होती. ‘एमसीई’ संस्थेतर्फे छत्रपती शिवाजी महाराज, महात्मा ज्योतिबा फुले, डॉ. बाबासाहेब आंबेडकर आणि महंमद पैगंबर यांच्या जयंतीदिनी त्यांना अभिवादन करण्यासाठी भव्य मिरवणुका काढल्या जातात आणि त्यातून महामानवांचे सामाजिक, शैक्षणिक संदेश प्रसारित केले जातात.